الآباء المشاهير + محاضرات لقداسة البابا شنودة الثالث +

بسم الآب والابن والروح القدس إله واحد آمين

الآباء المشاهير

البابا بطرس خاتم الشهداء

كنت قلت لكم إن أهم حاجة فى التاريخ تاخدوا بالكم من الشخصيات التى لها أهمية خاصة، يعنى عندنا 116 من الآباء البطاركة السالفين، مش معقول هتحفظوا 116 على الأقل تاخدوا بالكوا من الأسماء المشهورة اللى لها أهمية خاصة فى التاريخ.
أخدتم المرة اللى فاتت البابا ديمتريوس الكرام اللى هو البابا 12 واللى كانت فى ايامه مشكلة أوريجانوس واللى عمل تاريخ الأبقطى اللى هو تحديد مواعيد عيد الفصح. واخذتم أيضاً البابا ديونيسيوس الرابع عشر، وهو برضه من أساتذة الكلية الإكليريكية واتكلمنا عن الهطرقات التى حدثت فى أيامه وكيف وقف ضد هذه الهرطقات وعلاقته بشعبه وعلاقته بالكنائس الأخرى.
بعد [justify]منه جه البابا مكسيموس البطريرك 15 والبابا ثاؤناس البطريرك 16 وكلاهما كانا من أساتذة الكلية الإكليريكية قيل فى عهد البابا ثيؤناس، أؤسست أول كنيسة على اسم السيدة العذراء فى مصر ، بهذه المناسبة إذا تكلمنا عن الكنائس القديمة فيعنى ممكن أن تعرفوا أنه فى عهد الامبراطور ديوكلتيانوس اللى جه سنة 284 دك الكنائس كلها ، يعنى أكبر كنيسة أثرية فى مصر تكون بعد القرن الرابع أو أواخر القرن الرابع، كله ادك ! كان الناس فى ذلك الحين يصلون فى المقابر أو فى البيوت ، طبعاً أقدم كنيسة كانت الكنيسة المرقسية فى الإسكندرية كان الناس يصلون فى المقابر أو فى البيوت أو فى الأديرة المختفية فى الصحراوات، لكن كنائس كبيرة ولها منارة وقبة دى طوال عصر الاستشهاد لم تبقى . ولذلك اعتبر جزء من التاريخ الذى يذكر لهذا البابا اللى بقى أنه بنى كنيسة على اسم العذراء -فنشكر ربنا حالتنا عال- المهم إن جه بعد الاتنين البطاركة دول مكسيموس ال15 وياؤناس ال16 البابا بطرس خاتم الشهداء اللى هو 17 وده كان برضه من أساتذة الكلية الإكليريكية بل كان مدير الكلية الإكليريكية وكان قسيس قبل كده يعنى فى ذلك الحين لغاية البابا بطرس ال17 ماكنش فيه آباء بطاركة من الرهبان ، ده لم يستقر رسامة بطاركة من الرهبان إلا بعد البابا بنيامين 38 بعديه ، قبل كده يمكن فيه 3 أو 4 ومكانوش قاعدة استقر من ذلك الحين، لكن قبل كده كان أى واحد ، البابا مكسيموس كان قسيس اسمه مكسيموس والبابا ثاؤناس برضه كان نفس الوضع والبابا بطرس خاتم الشهداء كان قسيس كده ، ده البابا أثناسيوس البابا 20 كان شماس أخذوه يبقى بطرك في الوقت اللى كان موجود فيه الأنبا أنطونيوس الكبير أب جميع الرهبان وفى وقت كان موجود القديس باخوميوس الكبير ، لكن كانوا بياخدوا البطاركة من أى ناس ، غالبيتهم كانوا بيبقوا قسس عادية، ديمترويوس الكرام كان علمانى ، لكن راهب ولا شماس حتى ، كان راجل كرام. المهم إن البابا بطرس خاتم الشهداء لا نسميه خاتم الشهداء بمعنى ان الاستشهاد انتهى من أيامه ، لا، الاستشهاد ماشى فى كنيستنا إلى يومنا هذا ما ينتهيش أبداً ، لكن لعل خاتم الشهداء بالنسبة له تحمل معنيين ، معنى إنه آخر بطرك من الشهداء، وتعنى أيضاً إنه آخر واحد بالنسبة للشهادة العامة الشاملة التى تشمل مدن وقرى وآلاف ، الاضطهاد الكبير اللى كان موجود من ذلك النوع فختم الاستشهاد بهذا الشكل ، لكن بقى استشهاد الأفراد سمة موجودة فى كل العصور لا يخلو عصر من الاستشهاد هو البابا بطرس خاتم الشهداء تولى البطريركية سنة 285 قبل منه بسنة 284 كان استقر ديوكلتيانوس فى الحكم و284 ابتدينا احنا من ساعتها نسميها سنة الشهداء لأن كان أكبر استشهاد فى الكنيسة هو عهد ديوكلتيانوس وفى عهد ديوكلتيانوس لم يتم فقط استشهاد عن طريق الامبراطور فقط وإنما أيضاً عن طريق بعض الولاة القساة عن طريق أريانوس والى أنصنا ، ده نيافة الأنبا ديمتريوس عامل كنيسة باسم القديس أريانوس والى أنصنا ، يعنى هو بدأ فى الأول كمضطهد عنيف للكنيسة وانتهى إلى الإيمان والاستشهاد ، في ذلك الزمان اللى منه أرخت سنة الشهداء ابتداء من عصر ديوكلتيانوس 284 كان استشهاد فى تلك الفترة كلها استشهاد غالبية الشهداء الكبار فى الكنيسة، يعنى القديس مار مينا كان فى تلك الفترة القديس مار جرجس كان فى تلك الفترة القديسة دميانة كانت فى تلك الفترة القديس يوليوس الإقفهصى كاتب سير الشهداء كان فى تلك الفترة القديس أبيفام الجندى كان فى تلك الفترة الأمير بطرس الأمير تادرس المشرقى الأمير تادرس الاسفهسلار القائد كان فى تلك الفترة غالبية الشهداء الكبار كانوا فى تلك الفترة ، كانت هذه الفترة فترة عنيفة من جهة الاستشهاد ومن جهة الاضطهاد ، اضطهاد يعنى غلق الكنائس أو هدم الكنائس ، دى مش استشهاد ، هدم الكنائس أو حرق الكنائس أو حرق الكتب المقدسة ومنعها يعنى اللى يضبط معاه كتاب مقدس يقتلوه الذى لا يبخر للأصنام كانوا يقتلوه أنواع التعذيب البشع الخالية من الإنسانية كانت موجودة فى ذلك الزمان بالذات فى عصر ديوكلتيانوس والولاة القساة الذين عينهم ، فى عصر ديوكلتيانوس أيضاً قبض على أربعة من الأساقفة فى حبرية البابا بطرس خاتم الشهداء وقتلهم ، فى عهده أيضاً قتلت الكتيبة الطيبية ، أزيد من 6000 ، كان إمبراطور الغرب طلبهم هناك وعشان يعينوه وطبعاً قبل الحرب لازم يبخروا للأصنام فرفضوا ، فابتدت عملية قتل ، وكانوا برئاسة القديس موريتيوس ، ده يعتبر من القديسين الكبار فى سويسرا ، ومكتوب فى الموسوعة عندهم ، ومعه القديسة فيلينا اللى هى نشرت النظافة فى سويسرا، كانت بتشتغل معاهم فى الكتيبة الطيبية ، وصل ديوكلتيانوس فى بشاعة حكمه إلى أنه قتل زوجته وابنته لأنهما آمنتا بالمسيحية ، رجل أصابه نوع من الهوس والجنون ، فبقى القتل عنده مسألة سهلة جداً كل ده كان فى أيام البابا بطرس خاتم الشهداء ، وفى أيام البابا بطرس خاتم الشهداء قامت مشكلة أريوس ومشكلة ميليتيوس أسقف أسيوط ، واضطر البابا بطرس خاتم الشهداء أن يحرم أريوس ولما حانت ساعة انتقال البابا بطرس خاتم الشهداء عن طريق الاستشهاد جاله أريوس وطلب من الصفح ، فعلى الرغم من رقة طبعه ودماثة خلقه ووداعته قال ملعون أريوس من الكنيسة، وقال لتلميذيه أشيلاوس وألكسندروس إننى رأيت فى حلم السيد المسيح بملابس ممزقة وقلت له يا سيدى من مزق ثيابك ، فقال لى أريوس ، فقالا لتلميذيه أنتم هتجلسوا على الكرسى المرقسى بعد منى واحد بعد واحد إياكم أن تحاللا أريوس ، البابا بطرس كان محبوباً جداً من شعبه وأرادوا أن يقتلوه وتجمهر الشعب وأراد البابا بطرس إنه ينقذ شعبه فلا يقتلون بشعبه فهدأهم وأبعدهم وخللى الجنود ياخدوه لمكان بعيد وسلم نفسه للاستشهاد بعد أن صلى وتبارك من مكان رأس مار مرقس ورقد بسلام ، الشعب أخذ جثته وكفنوه بإكرام عظيم ، جه بعد منه أرشلاوس هو أقصر مدة فى البطريركية من ال16 من البطاركة السابقين ما قعدش غير 6 اشهر ليه سمح ربنا بكده؟ لأنه جاله أريوس واستسمحه وتظاهر بالإيمان السليم ، فلم يأخذ بنصيحة معلمه وأبيه البابا بطرس السابع عشر وحالل أريوس علشان كده مقضاش غير 6 اشهر وراح وإلا كانت الأريوسية ها تاخد لها مجال آخر، بعد كده جه مكسيموس وكان رجلاً كبير فى السن وبقى بطرك برضه ورفض أن يحالل أريوس وألغى الحل الذى أخذه من سلفه أرشيلاوس ودخلت المسألة الأريوسية فى دور كبير وعقد البابا الكسندروس البطريرك 19 مجمعاً فى الإسكندرية حضره 100 من أساقفة الكرسى المرقسى سواء فى مصر أو ليبيا وحكم ضد أريوس. الغرابة المبتدعون فى تاريخ الكنيسة كانوا دائماً معاندين وكانوا مصممين على فكرهم الهرطوقى ولا يسمعون النصيحة وفى نفس الوقت كانوا أذكياء إلا فى موضوع الهرطقة وكانوا لهم أشياع وأتباع ينضمون إليهم وكان الشيطان يغذيهم بالأفكار الهرطقية ، ولذلك لما جه القديس أثناسيوس قال عدونا ليس أريوس ولا الأريوسية، قال عدونا هو الشيطان ، هو اللى بيديهم الأفكار دى.
البابا بطرس خاتم الشهداء يعنى فى أيامه بعض فترات هادئة لكن الغالبية كانت اضطهادات ديوكلتيانوس وبدعة أريوس. وهو البابا 17 أرشيلاوس 18 ألكسندروس 19 أثناسيوس 20 ، فى عهدهم حدثت بعض هرطقات زى هرطقة مانى وبولس السيموساطى ولكن فى أوقات الهدوء كان الناس يرجعون إلى الإيمان فأصدر القديس بطرس خاتم الشهداء قوانين كنسية لقبول المرتدين الذين تابوا وعادوا إلى الإيمان، تلاقوا فى الكتاب بتاع قوانين الكنيسة اللى هو الجزء ال14 فى مجموعة أباء نيقية وما بعد نيقية جايبين القوانين الكنسية سواء بتاعة المجامع أو الآباء تلاقوا قوانين البابا بطرس خاتم الشهداء تلاقوا قوانين المرتدين الذين تابوا ورجعوا ، فيما بعد فى مجمع أنقرة وقيصيرية الجديدة اللى هم قبل نيقية برضه صدرت قوانين عن هذا الموضوع.
نكتفى بكده واتفضلوا نصلى.............